ހައްދުންމަތީ އަތޮޅު ތަޢުލީމީ މަރުކަޒުގެ ހައުސްތަކުގެ މެދުގައި ކޮންމެ އަހަރަކުވެސް ބާއްވަމުން އަންނަ ވާހަކަ ދެއްކުމުގެ މުބާރާތް މި އަހަރުވެސް ބާއްވައިފިއެވެ.

މި މުބާރާތުގައި ކޮންމެ ހައުސް އަކުން ހަތަރު ދަރިވަރުންބައިވެރިވެފައިވެއެވެ. އަދަބީ، އިޖްތިމާއީ އަދި ތިމާވެއްޓާއި ޤައުމިއްޔަތާއި ގުޅޭ މަޢުޟޫތަކެއް ކަނޑައަޅައިގެން ބޭއްވި މި މުބާރާތުގައި ބައިވެރިވި ދަރިވަރުންގެ ވާހަކަ ދެއްކުމުގެ ހުނަރު ދަށްކަން ފާހަގަކޮށްލަންޖެހެއެވެ. މުބާރާތަށް ދަރިވަރުން ތައްޔާރުވުމަށް ލިބުނުވަގުތު ކުޑަކަމާއި އަދި ދަރިވަރުން އަމިއްލަޔަށް ތައްޔާރުވުމުގެ ބަދަލުގައި މުދައްރިސުން ލިޔެ، ދަސްކުރަން ޙަވާލުކުރި ސްޕީޗްތަކެއް ދަސްކުރުމުގެ ސަބަބުން ދަރިވަރުންގެ ހުނަރު ފެނިފައިނުވާކަމަށް ލާމު އެޓޯލް ޑޮޓް ކޮމް އަށް މަޢުލޫމާތު ލިބިފައިވެއެވެ.

ދަރިވަރުންގެ ހިތްތަކުގައި ދިވެހި ބަހާއި ބަހުގެ އަދަބިއްޔާތަށް ލޯބިޖެއްސުމަށްކުރާ މިފަދަ ކަންކަމުގައި މުދައްރިސުންގެ އެހީތެރިކަން ބޭނުންވާނެއެވެ. ނަމަވެސް  އަނގައިން އަނގަޔަށް އަޅައިދީގެން ވާހަކަދެއްކުމަށް ދަރިވަރުން ތައްޔާރުކުރުމުގެ އާދަ ހިފެއްޓުމަކީ ދަރިވަރުންގެ ހުނަރު ތަރައްޤީވުމަށް އެޅޭ ހުރަހެއް ކަމުގައި ތަޖްރިބާކާރުން ފާހަގަ ކުރައްވައެވެ.